Со големо разочарување и револт ја забележуваме повторната употреба на терминот „Планинските езера на Струга (Лабуништа)“ од страна на Клуби алпин бјешкатар „Struga“.

Сакаме јавно да потсетиме дека езерата се наоѓаат на планината Јабланица и секое езеро има свое историско и географско име. Истите се наоѓаат во атарите на Лабуништа, Подгорци и Вевчани, а не во атарот на градот Струга.

Планината е богатство за сите и секој има еднакво право да ја посетува, истражува и промовира. Но, недозволиво е природни локалитети со јасно утврдена припадност да се претставуваат според нечии желби или интереси, бришејќи го локалниот идентитет и традиционалните називи.

Особено реагираме бидејќи ова не е првпат да се користи истиот термин, со што Лабунишките Локви и останатите планински езера повторно се претставуваат како „езера на Струга“.

Апелираме до сите планинарски, еколошки и туристички организации да покажат почит кон вистинските географски називи, локалната традиција и историската припадност на овие природни богатства.

Со почит, Ловечко Еколошко Планинарско Здружение „Стрижак“ – Лабуништа