Првите жители на селото Лабуништа кои имале можност да го обават светиот муслимански обред Хаџ во далечната 1900 г. биле Ќазим Ќазимоски, Адил Беќироски и Раим Алилов. Нивното патување до светите места Мека и Медина претставувало долг и предизвикувачки пат, кој траел цела година.

Ова патување било исполнето со духовно значење и посветеност, но и со бројни искушенија. До Саудиска Арабија патувале со коњи додека таму патувале со камили. Откако успешно го обавиле обредот Хаџ, тие тргнале назад кон своето родно место, носејќи со себе духовни благослови и длабоки впечатоци од светите места.

Меѓутоа, нивното патување завршило трагично. При престојот во еден ан во Битола, тие починале од труење предизвикано од јаглероден моноксид. Причината за оваа несреќа била големата количина јаглен што горел во мангалот во просторијата каде што преноќувале. Овој трагичен настан оставил длабока тага и жал кај нивните семејства и заедницата во Лабуништа. Нивните тела се закопани во Битола.

Нивната посветеност и желба да го исполнат еден од основните столбови на исламската вера останале запаметени како пример за вера, истрајност и пожртвуваност.

Едната слика е од Хаџи Ќазим Ќазимоски додека другата слика е извадок од записи на стар лабуништанец.

Нашата верзија е базирана на извадокот од тој документ додека има уште една верзија каде се спомнува дека прв заминал Адил Беќироски и се вратил здрав и жив додека наредната година заминале Ќазим Ќазомоски и Раим Адилов и нивното патување завршило трагично. Во Битола има два гроба.