Денес во кабинетот на градоначалникот на Општина Струга, г. Менди Ќура, беше одржана работна средба со членови на Месната заедница од Лабуништа, предводени од претседателот г. Тасим Тафилоски. На средбата присуствуваа и директорот на ЈКП „Хигиена“ г. Ирфан Рамизи, координаторот г. Адем Нуроски, како и советникот на градоначалникот од Лабуништа, г. Сафет Демиралиески.

На состанокот беа презентирани проблемите со кои секојдневно се соочуваат жителите на Лабуништа, при што акцент беше ставен на три приоритетни точки:

• Изградба на потпорен ѕид на локалниот пат Краста кај месноста Зенделовци.

• Тампонирање и бетонирање/асфалтирање на локалниот пат Пилчаровци – Подгорци, кај месноста Умиште во должина од 600м.

• Проблемите во снабдувањето со електрична енергија во Лабуништа.

Општина Струга, на чело со градоначалникот г. Ќура, за сите три точки даде позитивен одговор.

Беше истакнато дека во краток временски период ќе започне реализацијата на двата инфраструктурни проекти, а во однос на проблемот со електричната енергија најавена е заедничка средба со ЕВН и претставници на месните заедници од засегнатите населби. На таа средба, како што беше потенцирано, ќе биде побарано итно и трајно решавање на проблемот.

Дополнително, Општина Струга ја информираше Месната Заедница дека проектот за подобрување на водоснабдувањето во Лабуништа, како и целокупната техничка документација за изградба на прочистителна станица, се во завршна фаза.

Очекувањата се дека и овие проекти наскоро ќе бидат реализирани, со што ќе се решат дел од најголемите проблеми на жителите на Лабуништа.

Средбата беше оценета како конструктивна, со заедничка заложба за континуирана соработка и конкретни чекори за унапредување на условите за живот во Лабуништа.