Една од убавите традиции што претходните генерации Лабуништани со години ја негувале, а која и ден-денес е присутна во голем број семејства, е заедничкиот ручек после џума-намаз.

Петокот отсекогаш имал посебно место во животот на Лабуништани. По завршувањето на џума-намазот, семејството се собирало околу софрата и се чекале домашните да се вратат од џамија.

На петочната софра често се наоѓале и некои од препознатливите домашни јадења: комат (пита) со праз, сирење или грав, а понекогаш ручекот бил придружуван и со домашен сок од дренки. Едноставна храна, но со вкус што за многумина и денес буди спомени на домот, семејството и старото Лабуништа.

Оваа убава навика и денес се негува во многу лабунишки домови. За жал, со брзината на денешното време, работните обврски и модерниот начин на живеење, во сè поголем број семејства ваквите заеднички ручеци почнуваат да се прескокнуваат.

А можеби токму денес, кога сите некаде брзаме, најмногу ни се потребни ваквите мали традиции што нè потсетуваат да седнеме заедно, да се видиме, да се слушнеме и да не заборавиме дека семејството се чува и околу заедничката софра.