Вечерва, во италијанскиот град Монфалконе, започна традиционалниот Кермес – настан кој повторно ја оживеа љубовта, заедништвото и сплотеноста на Лабуништани ширум Европа. Повеќе од илјада наши сограѓани, пристигнати од Италија, Австрија, Словенија, Хрватска, Германија и Швајцарија, го исполнија просторот со топлина, насмевки и чувство на припадност што само Лабуништата може да го роди.

Своја духовна порака споделија имамот на Монфалконе – Неџат еф. Рустемоски, како и ценетите имами Шабан еф. Ќазимоски, Сенат еф. Нуроски , Авнија еф. Нурчески и Ајдоган еф Ибраими кои со својата мудрост и топли зборови како и учење на Куран со своите мелодични гласови ги обединија сите присутни во духот на благодарност и братска љубов, настанот заврши со предавање на Др. Шерик Курдиќ од Босна и Херцеговина, кој со своите зборови ја допре душата на секој присутен, потсетувајќи дека верата и човечноста се најголемите мостови меѓу луѓето.

Атмосферата беше исполнета со радост и мирисот на традицијата – познатото „Гравче од Казан“, подготвено со љубов од почитуваниот кувар Мусо Јускоски – „Лорд“ и неговите синови, кои специјално допатуваа од Лабуништа за да му дадат посебен белег на овој голем настан.

Овој Кермес не беше само празник на дружбата, туку и на доброто дело. Средствата собрани од настанот ќе бидат донирани за доградбата на новата џамија во Лабуништа, уште еднаш покажувајќи дека кога Лабуништани се обединети, можат да создадат чуда – каде и да се, во секој агол на светот.

Монфалконе вечерва блескаше во боите на братството, почитта и љубовта.

А Лабуништа уште еднаш ја покажа својата големина – место со душа, луѓе со срце и вера што обединува!