Денес заврши дводневниот Кермес во организација на џематот „Кевсер“ во Монфалконе, Италија. Настанот и оваа година помина во исклучително пријатна и духовна атмосфера, со присуство на повеќе од 1000 гости и посетители во двата дена.

Програмата во текот на денот започна со предавање за жени, кое го одржа Езана Беќироска, по што следеше пладне-намаз и заеднички ручек со подготвени 1000 порции храна за сите присутни. Гостите имаа можност да уживаат и во вкусувањето на традиционални јадења, подготвени со љубов од вредните раце на мајките и сестрите од заедницата.

По икиндија-намазот, со свое прекрасно учење на Куранот настапи Хафиз Алил Алили, а потоа следеше инспиративно предавање од Др. Шефик Курдиќ. Програмата беше затворена со изведба на илахија и завршно обраќање од страна на Хафиз Алил Алили, кој со своите зборови внесе посебна духовна енергија меѓу присутните.

Организаторите соопштија дека сите собрани финансиски средства од Кермесот ќе бидат донирани за доградбата на Горната Џамија во Лабуништа, што претставува уште еден доказ за силната врска и солидарност меѓу Лабунишката Дијаспора и родното место Лабуништа.

Настанот уште еднаш ја потврди сплотеноста, хуманоста и духовноста на заедницата во Монфалконе, која со своите активности континуирано придонесува кон зачувување на верата, културата и традицијата.