Sot përfundoi panairi dy-ditor i organizuar nga xhemati "Kevser" në Monfalkone, Itali. Ngjarja këtë vit kaloi në një atmosferë shumë të këndshme dhe shpirtërore, me mbi 1000 mysafirë dhe vizitorë të pranishëm gjatë të dy ditëve.

Programi gjatë ditës filloi me një ligjëratë për gratë, të mbajtur nga Ezana Beçiroska, pas së cilës u zhvillua namazi i mesditës dhe drekë e përbashkët me 1000 porcione ushqimi të përgatitura për të gjithë të pranishmit. Mysafirët patën mundësinë të shijonin edhe gatime tradicionale, përgatitura me dashuri nga duart e vjetra të nënave dhe motrave të komunitetit.

Pas namazit të ikindisë, me recitime të mrekullueshme nga Kur'ani u paraqit Hafiz Alil Alili, e më pas vijoi një ligjëratë frymëzuese nga Dr. Shefik Kurdiq. Programi përfundoi me këndim të ilahive dhe fjalim përmbyllës nga Hafiz Alil Alili, i cili me fjalët e tij solli energji të veçantë shpirtërore tek të pranishmit.

Organizatorët njoftuan se të gjitha mjetet financiare të mbledhura nga panairi do të dhurohen për ndërtimin e pjesës së sipërme të xhamisë në Labunishta, gjë që dëshmon edhe një herë lidhjen e fortë dhe solidaritetin ndërmjet Diasporës së Labunishtës dhe vendlindjes së tyre.

Ngjarja përsëri konfirmoi bashkimin, humanizmin dhe shpirtëroren e komunitetit në Monfalkone, i cili me aktivitetet e veta vazhdimisht kontribuon në ruajtjen e fesë, kulturës dhe traditës.