За жал, училишниот двор и самиот објект сè почесто се мета на несовесни и безобразни деца, но и на поединци од нашето место кои намерно го уништуваат она што им припаѓа на сите.

Пред кратко време просторот беше осветлен со цел да стане побезбеден, поубав и попријатен за учениците и жителите. Наместо да се чува и правилно да се користи, осветлувањето и училишниот простор се злоупотребуваат, оштетуваат и уништуваат.

Како што нè информираат од училиштето, за проблемот е реагирано и до надлежните институции, но, за жал, досега нема соодветна реакција ниту конкретни мерки за спречување на ваквото однесување.

Недозволиво е поради неколку несовесни жители да страдаме сите ние, а најмногу нашите деца. Училиштето треба да биде безбедно, уредно и достоинствено место за образование, а не простор што постојано се уништува и запоставува.

Се поставуваат две едноставни, но многу важни прашања: Дали е воопшто прифатливо вака да изгледа едно од најголемите училишта во државата? Дали нашите деца треба да учат и секојдневно да престојуваат во вакви услови?

Секоја скршена светилка, оштетена ограда или уништен дел од дворот е штета направена на сите нас. Ова не е проблем само на училиштето, туку на целата заедница.

Апелираме до родителите да разговараат со своите деца, до сограѓаните да покажат поголема одговорност, а до надлежните институции конечно да преземат конкретни мерки.

Да не дозволиме неколку несовесни лица да го уништуваат имотот на целата заедница. Нашите деца заслужуваат многу подобро.