Утре, 1 септември 2026 година, започнува новата учебна 2026/2027 година, а за 80 дечиња од Лабуништа тоа ќе биде првиот ден во училишните клупи.

Лабуништа и оваа година останува рекордер по бројот на првачиња меѓу руралните средини во државата. Вкупно 80 првачиња од Лабуништа од утре ќе го започнат своето образовно патување во ООУ „Мурат Лабуништи“.

Иако од година во година се забележува намалување на бројот на ученици, пред сè како последица на иселувањето на семејствата во западноевропските земји, Лабуништа и понатаму се издвојува со значителен број деца кои започнуваат прво одделение.

Генерацијата која оваа година треба да започне со основното образование брои околу 180 деца. Од нив, 80 своето образование ќе го започнат во родното Лабуништа, додека околу 100 деца ќе го започнат образовниот процес во земјите од Западна Европа, каде што нивните семејства се иселиле.

Овие бројки уште еднаш ја покажуваат големината на Лабуништа, но воедно и предизвикот со кој се соочува средината – иселувањето на младите семејства и нивните деца.

За најмалите утре започнува едно ново и значајно поглавје исполнето со нови знаења, другарства и незаборавни училишни моменти.

На сите ученици, а особено на нашите најмали првачиња, им посакуваме среќен почеток, многу успех, знаење и убави моменти во текот на учебната година! Среќно првачиња! 🎒📚