Македонскиот репрезентативен играч за врска ќе ја продолжи кариерата во кинескиот прволигаш Далијан Јингбо.

Алими, кој на 2 февруари ќе наполни 31 година, го напушта романскиот клуб Сепси каде играше од летото 2023 година. Таму го привлече вниманието на македонскиот селектор Благоја Милевски, дебитираше за Македонија и почна да биде редовен – благодарение на неговите добри настапи.

Далијан Јингбо ќе плати на Сепси 400.000 евра за неговите услуги. Алими оваа сезона одигра 17 натпревари во романската Суперлига, постигна 4 гола и двапати асистираше.

За Македонија, Алими досега има играно 13 натпревари а своето деби го имаше во септември 2023 година против Италија во Скопје и има постигнато 2 гола.

Неговиот нов тим Далијан Јингбо минатата сезона заврши на второто место во кинеската втора лига и се пласираше во првата лига. Новата сезона во кинеската лига започнува на 21 февруари.

И покрај неговиот трансфер во Далечниот Исток, се надеваме дека Алими ќе продолжи да биде редовен во националниот тим бидејќи се покажа како вреден адут.

Инаку Алими е од струшко Делогожда, а во својата богата кариера има настапувано меѓу другите и во калчолигашите Аталанта и Киево додека својата кариера ја започнал во струшки Влазними.