Жителите од населбата Краста во Лабуништа реагираат на состојбата со патот кој, како што велат, со сопствени средства и труд го формирале и асфалтирале самите жители.

Според нивните реакции, при интервенција на компанијата ЕВН, асфалтот бил пресечен, но по завршувањето на работите не бил саниран и вратен во првобитната состојба. Наместо тоа, ископот бил пополнет со тампон.

„При првиот дожд тампонот се разнесе на асфалтот, а водата започна да го оштетува патот“, реагираат жителите.

Денес на дел од улицата се забележуваат големи оштетувања и дупки, а камења и тампон се наталожени по коловозот, што дополнително ја отежнува безбедноста на сообраќајот.

Жителите бараат оштетениот дел да биде саниран и патот да биде вратен во состојба во каква што бил пред интервенцијата, особено имајќи предвид дека станува збор за пат кој, според нив, е изграден и асфалтиран со средства и ангажман на самите жители.

„Не бараме ништо повеќе од тоа патот да се врати во состојбата во која беше пред интервенцијата“, велат жителите на Краста.