Во утринските часови, околу 8 часот, во близина на село Подгорци избувна пожар кој зафати површина од приближно 40 хектари, при што изгореа сува трева и дел од ниска вегетација. Според првичните информации, пожарот е предизвикан од човечки фактор.

Огромна заслуга за навременото реагирање има познатиот активист од Подгорци, Шабан Адемоски, кој прв пристигна на местото на пожарот и преку апел на социјалните мрежи ги информираше мештаните за случувањето и ги повика да помогнат во гаснењето. Неговиот повик придонесе многу граѓани навремено да се организираат и да излезат на терен.

На почетокот во гаснењето интервенираа две возила – од Противпожарната служба и од Шумската полиција, кои не успеаја сами да го совладаат огнот. Подоцна пристигна поголемо противпожарно возило од Струга и уште едно возило од Лабуништа, со чие ангажирање пожарот беше успешно локализиран.

Покрај професионалните служби, во гаснењето активно се вклучија и млади доброволци од Подгорци кои со ранци со вода помагаа на непристапните делови каде што не можеше да се употреби црево. Значајна помош дадоа и доброволци од Лабуништа.

Благодарение на брзата реакција на пожарникарите, активистите и граѓаните, спречено е ширење на огнената стихија и можни поголеми последици.