Собранието ги усвои измените на Законот за игрите на среќа и за забавните игри, со кои се предвидува сите објекти во кои се приредуваат игри на среќа да бидат оддалечени најмалку 500 метри од основните и средните училишта.

Ова законско решение има за цел да обезбеди поголема заштита на децата и младите, да ја намали нивната изложеност на игрите на среќа и да создаде побезбедна средина околу образовните установи.

Потсетуваме дека пред извесно време Месната заедница Лабуништа организираше граѓански собир на кој една од главните теми беше токму проблемот со коцкањето и непосредната близина на објектите за игри на среќа до училиштето во нашето село.

На собирот граѓаните укажаа на низа негативни појави кои ги предизвикува ваквата состојба, меѓу кои:

• честото задржување на млади лица во непосредна близина на објектите;
• создавање несоодветна средина околу училиштето;
• зголемен ризик од развој на зависност од коцкање кај младите;
• негативно влијание врз воспитувањето и образовниот процес;
• нарушување на чувството на безбедност кај учениците и родителите.

Усвојувањето на овој закон претставува значаен чекор кон подобра заштита на младите генерации и исполнување на долгогодишните барања на многу граѓани и локални заедници кои се залагаа за поголема дистанца помеѓу образовните установи и објектите за игри на среќа.

Останува законските измени да бидат целосно имплементирани во пракса, со што ќе се овозможи побезбедна и поздрава средина за учениците и за целата заедница.