Денес се одржа заедничка средба помеѓу претставниците на месните заедници на с. Лабуништа, с. Боровец, с. Подгорци и с. Октиси, на која што се дискутираше за сериозните проблеми со електричната енергија кои ги засегаат овие населени места.

Веќе повеќе од еден месец граѓаните се соочуваат со чести прекини, слаб напон и нестабилно снабдување со електрична енергија, што предизвикува големи потешкотии во секојдневното функционирање на домаќинствата, бизнисите и јавните институции. И покрај бројните пријави и реакции, до денес од страна на ЕВН сè уште нема конкретно и трајно решение за овој проблем.

Средбата беше свикана на иницијатива на претседателот на Координативното тело, господинот Адем Нуроски, со цел заеднички да се разгледа состојбата, да се разменат информации и да се усогласат понатамошните чекори за надминување на проблемот. Посебно беше истакнато дека ваква заедничка средба помеѓу месните заедници не била одржана со години, што ја прави оваа иницијатива уште позначајна. Присутните се согласија дека вакви состаноци треба да станат редовна пракса и дека во иднина ќе се организираат уште многу вакви средби, на кои ќе се дискутира и за други заеднички проблеми со кои се соочуваат жителите од овие села.

Присутните се согласија дека е неопходно итно и координирано да се реагира, како и да се испрати заедничко барање до надлежните институции и до ЕВН, со цел што побрзо да се најде трајно и квалитетно решение за стабилно снабдување со електрична енергија.

Месните заедници ќе продолжат заеднички да делуваат и навремено да ја информираат јавноста за сите наредни активности.