Наставниците од ООУ „Мурат Лабуништи“ ја споделуваат оваа загриженост и апелират за поддршка и соработка во воспитно-образовниот процес:

Во последно време сè почесто се соочуваме со ситуации во кои секој обид за воведување ред, дисциплина и позитивни промени во училиштата наидува на негодување и отпор од страна на дел од родителите и заедницата. Како наставници, наша обврска е да обезбедиме безбедна, мирна и продуктивна средина за работа и учење, што подразбира јасно дефинирани правила – од забрана за користење мобилни телефони па сè до почитување на работниот ред и навременото извршување на обврските. За жал, често сме првите кои се соочуваат со критики и обвинувања кога преземаме чекори во насока на подобрување на воспитно-образовниот процес.

Сметаме дека е од суштинско значење родителите, наставниците и целата заедница да бидат партнери во воспитувањето и образованието на младите. Само преку меѓусебна поддршка, доверба и заедничко дејствување можеме да постигнеме вистински резултати и да создадеме генерации со здрави навики, одговорност и почит кон правилата. Образованието не е одговорност само на училиштето, туку заедничка мисија на сите нас кои се грижиме за иднината на нашите деца.