ЈКП „Хигиена-Лабуништа“ упатува апел до жителите на Лабуништа за рационално и совесно користење на водата од водоснабдителниот систем, особено во услови на високите летни температури.

Од претпријатието посочуваат дека во летниот период потрошувачката на вода значително се зголемува, што може да предизвика недостиг на вода и намален притисок, особено во повисоките делови на Лабуништа.

Граѓаните се повикуваат водата што е за пиење да не ја користат за полевање бавчи, миење дворови и автомобили, полнење базени и други ненаменски потреби.

Од ЈКП „Хигиена“ предупредуваат дека доколку продолжи прекумерната потрошувачка, може да се појават дополнителни проблеми во водоснабдувањето, а во краен случај и потреба од воведување рестрикции.

Претпријатието информира дека ги има активирано сите расположливи ресурси за одржување на квалитетно и непречено водоснабдување, но апелира и до граѓаните со своето одговорно однесување да придонесат за стабилно водоснабдување на Лабуништа.

Воедно, најавени се засилени контроли за откривање на неисправни водомери и неовластено користење на вода од водоводниот систем.