Синоќа во просториите на Месната заедница во Лабуништа се одржа состанок на кој присуствуваа претставници на МЗ Лабуништа, превозници од селото, здружението „НатураЛаб“ и ЈКП „Хигиена“ од Лабуништа.

Средбата беше иницирана од самите превозници, но за жал одзивот беше минимален.

Главна тема беше проблемот со дивите депонии, кои во последниот период повторно се појавија на повеќе локации, како и состојбата кај поранешните каменоломи, каде е определено место за истовар на земја и тврд материјал – шут.

Во наредните денови ќе бидат целосно отстранети дивите депонии долж патот кон Горна Краста, како и наталожениот шут покрај патот кај поранешните каменоломи.

На критичните места ќе биде ставен во функција видео надзор, кој ќе го покрива патот кон Горна Краста, просторот кај поранешните каменоломи и други локации каде постои можност за создавање диви депонии.

Важно известување за просторот кај каменоломите:

Таму е дозволено исклучиво истоварување на земја и тврд материјал – шут. Строго се забранува фрлање кабаст и комунален отпад.

За помал кабаст отпад, како што се мебел, електрични апарати, теписи и слично, ќе биде определено посебно обележано место, од каде отпадот потоа ќе биде преземан од ЈКП „Хигиена“ и транспортиран до депонијата во Струга.

Превозниците товарот задолжително треба да го истоваруваат директно во големите отвори. Строго се забранува истоварување покрај патиштата што водат до нив и затрупување.

Дополнително, просторот кај каменоломите ќе се користи исклучиво за шут и земја од Лабуништа.

Забрането е носење отпад од други населени места, без разлика дали превозникот е од Лабуништа.

Компаниите кои вршат поголеми ископи во Лабуништа и го истоваруваат материјалот на оваа локација ќе бидат задолжени по завршувањето на истоварот, со багер или булдожер, да го распоредат и истуркаат материјалот за да не се создава затрупаност и неред.

Од Месната заедница, ЈКП „Хигиена“ и „НатураЛаб“ апелираат до сите превозници, компании и граѓани да ги почитуваат утврдените правила и да придонесат за почиста и поуредна Лабуништа.

Секој што нема да ги почитува правилата ќе биде евидентиран преку видео надзорот и пријавен до надлежните инспекциски служби за животна средина, каде што ќе следуваат соодветни парични санкции.

Исто така видео записите од прекшителите на овој правилник ќе бидат објавувани јавно на социјални мрежи и медиуми.

Со почит,

Месна заедница Лабуништа

ЈКП „Хигиена“

Здружение „НатураЛаб“ Лабуништа