Денеска, во рамки на најавената акција на Месната заедница Лабуништа, во соработка со здружението „НатураЛаб“, беа отстранети новоформираните диви депонии на патот кон Горна Краста, создадени од несовесни граѓани.

Акцијата опфати и расчистување на отпадот на локацијата позната како „Каменоломите“, каде повторно беше забележано неодговорно однесување со оставање отпад на несоодветни места.

Од Месната заедница информираат дека борбата против создавањето диви депонии продолжува, а како дополнителна мерка веќе е започнато поставување на видео надзор на сите критични локации кои се потенцијални места за повторно создавање на диви депонии.

Од Месната заедница Лабуништа најавуваат и остри санкции против сите оние кои во иднина ќе се обидат да ја загадуваат животната средина, со цел да се заштитат природата, јавните површини и животната средина во Лабуништа.

Апелот до сите граѓани е јасен: отпадот не припаѓа во природата! Само со заедничка одговорност и почитување на животната средина може да се зачува Лабуништа чисто и уредно.