Високо на падините на планината Јабланица, на само неколку километри од Лабуништа, се наоѓа едно од највпечатливите природни богатства во Македонија – Лабунишките Бачила, место кое мештаните со гордост го нарекуваат и „Лабунишките Алпи“.

Низ својот фотообјектив, љубителот на природата Амер Демиши уште еднаш ја доловува величественоста на оваа планинска убавина. Неговите фотографии сведочат за недопрената природа, зелените пасишта, кристално чистите извори и импозантниот врв Стрижак, кој со своите 2.233 метри надморска височина доминира над целиот предел.

Лабунишките Бачила одамна се омилена дестинација за љубителите на планинарењето, фотографијата и мирот што го нуди планината.

Во непосредна близина се наоѓаат и глацијалните Лабунишки Езера (Локви) , кои дополнително ја збогатуваат природната убавина и го прават овој предел едно од најатрактивните места за активен туризам во земјата.

Фотографиите на Амер Демиши уште еднаш потсетуваат дека за да се доживеат пејзажи кои наликуваат на швајцарските Алпи, не е потребно да се патува далеку. Доволно е да се посети Јабланица и Лабунишките Бачила – место каде природата ја покажува својата најубава страна.

Лабунишките Бачила се вистински бисер на Јабланица и гордост на Лабуништа – дестинација која секој љубител на природата треба барем еднаш да ја посети.

Лабунишки Бачила се оддалечени само 6 км од Лабуништа и до таму се стигнува со секакво превозно средство по асфалтиран пат.