На 1.700 метри надморска височина, на падините на планината Јабланица, се наоѓаат Лабунишките бачила – жив споменик на една длабока традиција што го одржува ритамот на животот меѓу луѓето и природата.

Овде, генерации сточари го продолжуваат вековниот начин на живот, претворајќи го свежото млеко во препознатливото планинско сирење. Планинската клима, чистата изворска вода и природните пасишта ја даваат таа посебна арома и квалитет што не може да се најде на друго место.

Но, бачилата не се само за љубителите на гастрономијата. Тие се место каде што природата го освојува секој посетител – од врвот Стрижак и двата кристално чисти леднички езера, до богатството од билки, боровинки, малини и планински цвеќиња. А кога ќе падне ноќта, небото над бачилата се претвора во еден од најубавите ѕвездени спектакли во регионот.

Europe House Struga со гордост ја поддржува оваа приказна, затоа што Лабунишките бачила се повеќе од традиција – тие се живо наследство што заслужува да биде зачувано и споделено.

📍 Ако патот ве однесе над Струга, ова е едно од местата што вреди да го откриете.

Фотографи: Maja Janevska-Ilieva & Samir Demishi Благодарност за Saban Ademoski кој беше дел од екипата со Europe House Struga и помогна околу реализацијата.