ЛАБУНИШТА – Во атмосфера исполнета со спортски дух и пред повеќе од 700 гледачи, вечерва се одигра финалето на традиционалниот меморијален турнир во мал фудбал, кое донесе многу емоции, динамична игра и неочекуван крај.

Финалниот натпревар ги соочи екипите на Бинај од Лабуништа и Лавадо Кафе од Струга, кои во текот на целиот турнир покажаа врвен квалитет и борбеност.

Први до предност дојде тимот на Лавадо Кафе со гол постигнат од слободен удар, но екипата на Бинај не дозволи резултатот да остане непроменет. Во завршницата на првото полувреме, по одлична тимска акција, изедначија на 1:1.

Второто полувреме целосно му припадна на тимот на Бинај, кој со доминантна игра создаде серија шанси и постојано го притискаше противничкиот гол. Клучниот момент се случи во последните минути од натпреварот, кога играч на Лавадо Кафе играше со рака во својот петерец. Главниот судија досуди пенал за Бинај, што предизвика бурни реакции кај играчите на Лавадо Кафе.

Наместо да продолжат со игра, тимот на Лавадо Кафе го напушти теренот во знак на револт, а по неколку неуспешни обиди на судијата да ја продолжи играта, беше донесена одлука за службена победа на екипата на Бинај.

Со ова, екипата на Бинај ја освои титулата на овогодинешниот меморијален турнир, оставајќи силен впечаток со својата борбеност, дисциплина и спортски карактер.

Пред финалниот меч се одигра уште еден натпревар за трето место помеѓу екипата на Бени Ерол од Струга и екипта на БерберШоп Мухаммед од Лабуништа на кој натпревар, победа оствари екипата на БерберШоп Мухаммед и со тоа го освои третото место.

Турнирот уште еднаш ја потврди својата важност како значаен спортски и општествен настан во регионот, привлекувајќи големо внимание и поддршка од локалната заедница.