Телевизија Менора (TVM) вчера објави репортажа посветена на руралниот туризам во струшкото село Подгорци, подготвена од новинарката Соња Рилковска. Во прилогот детално е прикажана автентичната авантура што ја нуди ова живописно подножје на Јабланица – комбинација од традиција, природа и незаборавни активности.

Преку проектот што го развива туристичкиот работник Шабан Адемоски, гостите имаат можност да доживеат нешто навистина уникатно: јавање коњи, стрелање со лак, подготовка локална храна, палење логорски оган, берење шумски плодови и лековити чаеви. На неговиот ранч над селото, посетителите се впуштаат во авантура која ги спојува руралниот живот, природната убавина и богатата мултиетничка традиција на Дримколскиот регион.

Како што истакнува Адемоски во репортажата, сè што се нуди е природно и автентично – од свежата градинарска храна, до шетањата низ планината и посетата на Подгоречкото езеро на над 2000 метри надморска височина. Токму оваа оригиналност привлекува туристи од Холандија, Словенија, Белгија, Италија и Малезија, кои често од планирани два часа остануваат и по цел ден, уживајќи во логорски оган, риболов и локални специјалитети.

Јабланица изобилува со природни ресурси и еколошки производи кои, како што се наведува и во прилогот, можат да станат препознатлив бренд на регионот и да донесат значаен економски развој за локалното население.

Репортажата на Соња Рилковска уште еднаш го истакнува потенцијалот на Подгорци како рурална туристичка дестинација што нуди искуство кое ретко може да се најде на друго место.

Прочитај го целиот текст тука