Повеќе од 30 години оваа улица остана со стариот бетон поставен за време на некогашните селски работни акции. Со текот на времето, бетонот се распука, се амортизира и на многу места целосно се распадна, па делови од улицата повеќе наликуваа на земјен и каллив пат отколку на сообраќајница.

Денес конечно започна асфалтирањето на оваа улица, на потегот од чешмата кај селското училиште до раскрсницата над месноста Речиште. Со ова, една од последните улици што сè уште беше со стар бетон добива нов асфалтен слој, што значително ќе ги подобри условите за движење на жителите.

Секоја реконструирана улица претставува чекор кон поуредена и побезбедна населба. Останува надежта дека и останатите оштетени улици ќе бидат обновени во наредниот период, со што постепено ќе се подобри целокупната патна инфраструктура.

Воедно, останува и потребата овој потег да добие улично осветлување, бидејќи станува збор за една од најтемните улици во населбата, што е особено важно за безбедноста на пешаците и возачите во вечерните часови.