На 20 септември во Тетово се одржа Купот на Македонија за сениори со селективен карактер за претстојниот Светски квалификациски турнир во Париз. Големиот успех го одбележа младата и талентирана Греса Мустафаи од Карате клубот „Арена“, која иако натпреварувачка во категоријата У21, реши да настапи меѓу сениорите и – го освои првото место!

Со импресивна техника, силна решителност и професионален настап, Греса ја освои титулата шампионка на Македонија и обезбеди место во националниот тим кој ќе настапи во борби +68 кг на престижниот турнир во Париз (17–19 октомври). Овој настап ќе биде одлучувачки за учество на Светското првенство во карате за сениори во Каиро, кое ќе се одржи од 27 до 30 ноември.

Важен дел од овој успех е и поддршката на нејзиниот тренер Шефи Речи и заменик-тренерот Ерол Зенделоски, кои ја водеа и охрабруваа низ целиот натпреварувачки процес.

Честитки за Греса Мустафаи – шампионка, мотиватор и инспирација за младите кои сонуваат за спортски врвови. Ѝ посакуваме уште поголеми победи во Париз, затоа што ова е само почеток на една блескава спортска приказна.