Тука се слушаше детска смеа од рано наутро до доцна навечер. На овој асфалт се одиграа безброј фудбалски и кошаркарски натпревари, се создадоа пријателства за цел живот, а многу генерации ги направија своите најубави спомени.

Летните распусти беа незамисливи без вечерните турнири. Од трибините и околу теренот се собираа родители, дедовци, баби и пријатели. Секој натпревар беше празник, секој кош и секој гол се славеше со аплауз. Тука растеа идните спортисти, но пред сè – добрите луѓе.

Денес, дворот веќе не е она што беше. Времето си го направило своето, но спомените остануваат живи.

Затоа е време повторно да вложиме труд, љубов и заедничка грижа. Да му го вратиме стариот сјај и да создадеме модерен, безбеден и убав простор каде што новите генерации ќе трчаат, ќе спортуваат, ќе другаруваат и ќе создаваат свои незаборавни спомени.