По успешната и инспиративна организација на Лабуништаните во Италија, сега по истите благородни стапки чекорат и нашите Лабуништани од Австрија. Со голема љубов, посветеност и вера, Дијаспората од Горна Австрија организира донаторска вечер по повод доградбата на џамијата „Мехмед Али Паша“ во Лабуништа. Настанот ќе се одржи на 22 ноември 2025 година, во просториите на Volkshaus Neue Heimat, Linz, со почеток од 16:30 до 21:00 часот.

Под слоганот инспириран од зборовите на Пратеникот, с.а.в.с: „Кој ќе изгради џамија ради Аллах, Аллах ќе му изгради куќа во Џеннет“ , Лабуништаните уште еднаш покажуваат дека љубовта кон верата, заедништвото и родното огниште немаат граници.

Вечерта ќе биде исполнета со богата духовна програма — учење на Куран, илахии и предавања, со гости:

Хафиз. Мурат Башер

Маг. Енес Омеровиќ

Хафиз. Мустафа Усеиноски

Хафиз. Ахмед Усеиноски

Хафиз. Мухаммед Усеиноски.

Средствата собрани на овој настан ќе бидат целосно наменети за доградба на џамијата „Мехмед Али Паша“ во Лабуништа — место кое за секој Лабуништанец претставува симбол на вера, припадност и духовна сила.

Оваа иницијатива уште еднаш ја потврдува нераскинливата врска меѓу дијаспората и татковината. Иако далеку од родниот крај, срцата на Лабуништаните чукаат во ист ритам — со љубов, солидарност и гордост кон местото од кое потекнуваат. Дијаспората од Австрија со овој гест не само што вложува во објект од камен, туку и во духовен дом што ќе ги поврзува генерациите кои доаѓаат.

Љубовта кон Лабуништа не познава далечина — таа се гради со вера, срце и дела.