Јавен собир во Лабуништа за заштита на младината од негативни појави

Во Лабуништа во петок, на 24 април 2026 година, по Јација намаз, ќе се одржи јавен собир во просториите на поранешно „ИКРЕ“, на кој ќе се отвори широка дискусија за предизвиците со кои се соочува младината во ова место.

Организаторите информираат дека целта на собирот е да се подигне свеста и да се поттикне заедничка акција против појави кои, како што велат, подолг период негативно влијаат врз младите.

Меѓу главните теми на дискусија ќе бидат клубовите со видео игри и спортските обложувалници, кои сè повеќе се присутни и оставаат последици врз однесувањето и иднината на младите генерации.

Граѓаните се повикуваат да присуствуваат во што поголем број и активно да се вклучат во разговорот, со цел изнаоѓање конкретни решенија и иницијативи за подобрување на состојбата.

Организатори на настанот се џамиските одбори, и здружението „Натура-Лаб“, додека координатор е Месната заедница на Лабуништа.