Në ambientet e Ndërmarrjes Publike Komunale “Higjiena” sot arriti dërgesa e parë me rreth 250 koshash për plehra, të cilat ishin paralajmëruar më parë nga Komuna e Strugës.

Kjo dërgesë paraqet fillimin e procesit për përmirësimin e higjienës komunale dhe avancimin e kushteve për ruajtjen e pastërtisë në Labunishta. Koshat për plehra do të jenë të dedikuara për familjet, me qëllim mbledhjen dhe menaxhimin më efikas të mbeturinave komunale.

Në periudhën në vazhdim pritet të arrijnë edhe dërgesat e tjera, pas së cilave koshat do të shpërndahen në përputhje me nevojat e banorëve.

Nga Komuna e Strugës theksojnë se këtu nuk ndalen dhe se kjo është vetëm një nga seritë e projekteve të planifikuara dhe që do të realizohen në periudhën që vijon. Në plan janë edhe shumë aktivitete dhe investime të tjera të drejtuara drejt përmirësimit të infrastrukturës komunale dhe krijimit të një mjedisi më të pastër dhe më të shëndetshëm për të gjithë banorët.

Autoritetet bëjnë apel tek qytetarët për përdorim të përgjegjshëm të koshave dhe kujdes të përbashkët për pastërtinë publike.