Sukses i madh për Labunishtën dhe për talente të rinj nga rajoni ynë. Ejlem Bekiroska, nxënëse në vitin e parë në shkollën e mesme PSU “Jahja Kemal” – Strugë, fitoi medalje bronzi dhe vendin e 3-të në garën ndërkombëtare INFOMATRIX ASIA 2026, e cila u mbajt në Astana, Kazakistan.

INFOMATRIX ASIA është një garë ndërkombëtare për inovacione që për mbi një dekadë përfaqëson një platformë për talente të rinj në fushën e teknologjisë, shkencës dhe artit digjital. Gara është e dedikuar për promovimin e bashkëpunimit dhe shkëlqimit krijues në IT, shkencë dhe sipërmarrje në nivel global.

Në garë morën pjesë më shumë se 3000 garues në disa kategori, që e bën këtë sukses edhe më të rëndësishëm. Në një konkurrencë të fortë ndërkombëtare, Ejlem arriti të paraqitet denjësisht dhe të arrijë një rezultat të respektueshëm.

Ky sukses përbën një krenari të madhe për Labunishtën, familjen e saj, shkollën dhe gjithë komunitetin. Fitorja e medaljes së bronztë në një ngjarje të tillë ndërkombëtare dëshmon se të rinjtë nga Labunishta kanë njohuri, talent dhe potencial për të konkurruar me më të mirët.

Suksesi i Ejlem Bekiroskës është frymëzim për të gjithë të rinjtë e Labunishta dhe më gjerë që me përkushtim, punë dhe besim në vetvete mund të arrijnë rezultate të mëdha edhe në arenën ndërkombëtare.