Myftiu i Strugës, H. Adi ef. Murtiši, sot në ambientet zyrtare të Myftinisë së BFI Strugë, solemnish i dorëzoi Dekretet për shërbim imamësh dy imamëve të Xhamisë së Poshtme në Labunisht – Istref ef. Juskoski dhe Anis ef. Izeti.

Në një atmosferë të këndshme dhe vëllazërore, Myftiu i uroi imamët duke theksuar përgjegjësinë e madhe që bart kjo detyrë fisnike. Ai nënvizoi rëndësinë që imami të jetë dritë udhëzimi, fjalë e mençurisë, shembull i sjelljes morale dhe mbështetje e vërtetë për besimtarët dhe komunitetin ku shërben.

"Shërbimi i imamit është nder, por edhe përgjegjësi e lartë ndaj Allahut dhe ndaj komunitetit. Çdo imam duhet të jetë udhërrëfyes, mbështetje dhe shembull i mirë në jetën e përditshme," përcolli Myftiu Murtiši.

Myftinia e Strugës u dëshiroi imamëve sukses, bereqet dhe lehtësi në përmbushjen e misionit të tyre, duke i lutur All-llahun Fuqiplotë t'u dhurojë sinqeritet, forcë dhe shpërblim për përkushtimin dhe për çdo hap në këtë rrugë të bekuar.