Kjo pyetje ishte pjesë e hutbës së së premtes së ef. Enis Maksutoskit, në të cilën u diskutua rëndësia e ruajtjes së lidhjeve familjare, respektimit të prindërve dhe përgjegjësisë për sjelljen tonë ndaj të tjerëve.

askush nuk do të dëshironte të flet keq apo të mallkojë prindërit e tij. Por, ndonjëherë, me veprimet tona, ne bëjmë që të tjerët të drejtojnë fjalë të pista dhe mallkime ndaj tyre. Prandaj duhet të pyesim veten: a i nderojmë prindërit me sjelljen tonë apo i ekspozojmë ndaj ofendimeve?

Kur bllokojmë rrugën me makinën tonë dhe pengojmë kalimin, kur bëjmë zhurmë të panevojshme me motorët, sidomos kur njerëzit po pushojnë, kur vozisim rrezikshëm në zona të banuara, hedhim mbeturina para shtëpive të të tjerëve apo ofendojmë prindërit e të tjerëve — ne shkaktojmë zemërim që mund të kthehet në fjalë të pista ndaj familjarëve tanë. Kjo nuk justifikon ofendimet e të tjerëve, por na kujton se veprat tona kanë pasoja.

Respekti ndaj prindërve tregohet edhe përmes sjelljes jashtë shtëpisë. Le të ruajmë lidhjet familjare, të kujdesemi për paqen dhe të drejtën e të tjerëve dhe të jemi shkak që prindërit tanë të përmenden me mirë.