Në Labunishta janë pastruar plotësisht deponitë ilegale që për një periudhë të gjatë ishin problem për banorët dhe për pamjen e vendbanimit.

Aktualisht po vendoset edhe mbikëqyrja me video, për të parandaluar krijimin e përsëritur të deponive ilegale dhe hedhjen jo të përgjegjshme të mbeturinave.

Gjithashtu, Komuna vendore ka siguruar një vend të veçantë për parkin e automjeteve të Ndërmarrjes Komunale “Higjiena”, ku mjetet e ndërmarrjes nuk do të parkojnë më në rrugët e Labunishta, por do të kenë vendin e tyre të caktuar. Në afërsi të parkut të automjeteve do të caktohet dhe një hapësirë e veçantë për lënien e mbeturinave të mëdha, ku qytetarët do të mund të lënë rregullisht objekte si karrige të vjetra dhe mobilje tjera, dyshekë, qilima e tapete, dyer e dritare, pajisje sanitare, objekte më të mëdha shtëpiake dhe mbeturina të tjera të mëdha.

Në këtë mënyrë do të mundësohet që këto mbeturina të mblidhen në një vend të caktuar, në vend që të mbeten pranë kontejnerëve, në rrugë ose të përfundojnë në deponi ilegale.

Me këtë aktivitet, Labunishta fiton një ambient më të pastër, më të rregullt dhe më të organizuar. Tani mbetet të kujdesemi të gjithë së bashku për atë që është pastruar dhe rregulluar.