Sektori i Grave pranë Muftisë së IVZ Strugë sot organizoi një program të veçantë në ambientet e Muftisë, kushtuar ngjarjes madhështore të Isra dhe Mi'raj. Programi u shoqërua me ligjërata të dobishme dhe tema që lidhen drejtpërdrejt me gjendjen shëndetësore dhe mirëqenien e grave në shoqëri.

Ligjëratat u mbajtën nga teologu Hurije Mehmeti-Biba dhe dr. Hadjere Alied, të cilat ndanë me pjesëmarrëset njohuri të vlefshme dhe këshilla praktike nën temën: „Kundër kancerit të mitrës – Parandalimi dhe vetëdija“.

Teologu Hurije Mehmeti-Biba transmetoi mesazhe frymëzuese nga Isra dhe Mi'raj, duke theksuar rëndësinë e kujdesit shpirtëror dhe fizik për gruan, si një amanet nga Zoti. Ajo theksoi mesazhin se Islami inkurajon kujdesin për shëndetin dhe ngritjen e vetëdijes për rëndësinë e kontrolleve të rregullta shëndetësore.

Nga ana tjetër, dr. Hadjere Alied ofroi një qasje më shkencore, duke ndarë informacione të detajuara për parandalimin dhe trajtimin e kancerit të mitrës, një problematikë delikate që prek shumë gra në mbarë botën. Ajo theksoi rëndësinë e diagnostikimit të hershëm, analizave periodike dhe stilit të shëndetshëm të jetesës si hapa të domosdoshëm për parandalimin e kësaj sëmundjeje.

Pjesëmarrëset e shumta që morën pjesë në këtë ngjarje patën mundësinë të ndajnë përvoja personale, të bëjnë pyetje dhe të marrin përgjigje nga ekspertet e pranishme. Ky program u vlerësua si një nga aktivitetet më të rëndësishme, jo vetëm për forcimin e besimit dhe lidhjes shpirtërore, por edhe për ngritjen e vetëdijes tek gratë për shëndetin e tyre dhe rëndësinë e kujdesit për veten.

Ky program ishte një thirrje e fuqishme për kujdes shpirtëror dhe fizik, duke frymëzuar të pranishmet të jenë të vetëdijshme për vlerat e tyre dhe rëndësinë e shëndetit të mirë si një dhuratë nga Allahu.