Labunishta është një nga fshatrat më të mëdhenj dhe më të gjallë në rajon, me një popullsi në rritje dhe me shumë familje të reja. Njëherë e kanë pyetur një banor të Labunishtës:

– Sa banorë ka Labunishta?

Ai ka përgjigjur: „Rreth 10.000.“

– E fëmijë?

Me buzëqeshje ka thënë: „Fëmijë? Një milion!“

Kjo shprehje ndoshta është simbolike, por zbulon të vërtetën më të madhe për fshatin tonë – se pasuria e vërtetë e Labunishtës nuk janë numrat, por zemrat dhe buzëqeshjet e fëmijëve të tij. Çdo lindje e tyre është një shkëndijë e re shprese, një arsye e re për krenari dhe një motiv i ri për t’i besuar të ardhmes.

Gati çdo vit në fshat lindin rreth 150 fëmijë. Fatkeqësisht, gjysma e tyre me familjet e tyre largohen për në vendet perëndimore, në kërkim të një jete më të mirë dhe punë të sigurt. Por edhe përkundër kësaj, ky numër është dëshmi e qartë se Labunishta është një fshat me të ardhme – të ardhme që duhet të përkujdeset, të mbështetet dhe të ruhet këtu, në shtëpi.

Aktualisht, boshllëku më i madh në komunitetin tonë është mungesa e një kopështi fëmijësh. Kjo nuk është vetëm një problem organizativ për prindërit – është një pengesë serioze për banorët më të vegjël të fshatit. Vitet e para të jetës janë kyçe për formimin e karakterit, për mësim dhe për socializim. Nëse fëmijët nuk kanë një ambient ku të zhvillohen, të bëjnë shoqëri dhe të mësojnë, ata humbasin mundësi të paçmueshme që më pas janë të vështira për t'u kompensuar.

Kopshti nuk është një ndërtesë e zakonshme me mure dhe dhoma mësimi – ai është institucioni i parë arsimor, tempulli i parë i dijes dhe kuriozitetit. Atje fëmijët do të mësojnë këngët e para dhe shkronjat, do të krijojnë miqësi që do të zgjasin gjithë jetën dhe do të bëjnë hapat e parë drejt botës së njohurive. Në kopësht zgjohet kreativiteti i tyre, ndërtohet vetëbesimi i tyre dhe hapet rruga për një arsimi më të suksesshëm.

Njëkohësisht, kopështi është edhe mbështetje e madhe për prindërit. Ai do të thotë siguri që të vegjëlit e tyre janë të kujdesur në një ambient të sigurt dhe stimuluese, dhe familjet fitojnë më shumë liri për të punuar, për t’u zhvilluar dhe për të qëndruar në fshat. Mungesa e një institucioni të tillë, përkundrazi, i bën familjet e reja të kërkojnë zgjidhje jashtë – në një qytet tjetër ose në një vend tjetër.

Nëse duam të ruajmë të rinjtë, nëse duam të ndërtojmë një të ardhme më të fortë për Labunishta, duhet t’u japim arsye të qëndrojnë. Dhe arsyeja më e madhe janë pikërisht fëmijët.

Ndërtimi i një kopështi fëmijësh është një investim që do të thotë:

• Mbështetje dhe zhvillim i duhur për çdo fëmijë që nga mosha e hershme.

• Krijim i një ambienti të shëndetshëm, të ngrohtë dhe stimuluese për mësim dhe lojë.

• Lehtësim për prindërit e rinj dhe nxitje për të qëndruar në fshat.

• Forcim i komunitetit përmes investimit tek më të vegjlit.

• Një të ardhme e sigurt dhe e ndritshme për Labunishta, ndërtuar nga vetë banorët.

Çdo komunitet që investon në fëmijët e tij, investon në qëndrueshmërinë dhe përparimin e vet. Fëmijët janë kapitali ynë më i madh, shpresa dhe krenaria jonë.

Është koha që edhe Labunishta të bëjë këtë hap – sepse fëmijët tanë meritojnë më të mirën, dhe fshati ynë meriton të ardhmen e tij.