Persona të panjohur, për arsye ende të panjohura, natën e kaluar thyen pjesën e derës hyrëse dhe hynë dhunshëm në ambientet e ish-„Ikre – Toleransa“ në Labunisht.

Gjatë hyrjes, kryesit dëmtuan pjesë të inventarit, përfshirë tavolina dhe karrige, duke lënë pas dëme materiale dhe ndjenjë revolte tek banorët.

Ky akt nuk përbën vetëm vandalizëm ndaj objektit, por edhe një sulm të drejtpërdrejtë ndaj Labunishtës dhe komunitetit të saj.

Bëhet fjalë për ambiente publike që përdoren prej vitesh për ngjarje të ndryshme, tubime, aktivitete kulturore dhe shoqërore të rëndësishme për të gjithë qytetarët.

Sulmi ndaj një ambienti të tillë është një sulm ndaj vlerave të përbashkëta, punës dhe unitetit të banorëve.

Presim nga institucionet përgjegjëse të veprojnë menjëherë, të zbardhin rastin dhe të gjejnë kryesit, në mënyrë që ngjarje të tilla të papërshtatshme të mos përsëriten.

Labunishta nuk duhet të jetë cak i shkatërrimit dhe kaosit, por vend jete, respekti dhe kujdesi i përbashkët për të mirën publike.

Qytetarët bëjnë thirrje për përgjegjësi dhe solidaritet më të shtuar, si dhe për ruajtjen e ambienteve komunale dhe publike që i përkasin të gjithëve.