Sot, menjëherë pas faljes së sabahut, në frymën e traditës shekullore, banorët e Labunishtë nisën më shumë se 40 bashkëqytetarë të tyre drejt vendeve më të shenjta të islamit – Mekën dhe Medinën, ku do të kryejnë shtyllën e pestë të besimit islam – Hadxh.

Nisja, si çdo vit tjetër, ishte e mbushur me emocione, përkushtim shpirtëror dhe krenari. Nga qendra e fshatit deri te stacioni i autobusëve, rrugët e Labunishtë jehonin me tekbire, duke lartësuar emrin e Allahut të Plotfuqishëm xh.sh. Gëzimi dhe urimet shoqëroheshin me lot, lutje dhe dëshira për udhëtim të sigurt dhe ibadete të pranueshme.

Kjo traditë fisnike praktikohet që nga viti 1963, kur banorët e fshatit u mblodhën për herë të parë për t’i përcjellë në hadxh atëherë imamun dhe besimtarin e respektuar, rahmetli Haxhi Arslan Qazimoski. Që atëherë, çdo vit, me të njëjtën dashuri dhe respekt, Labunishta qëndron pas besimtarëve të saj që përgatiten të kryejnë përpjekjen më të madhe shpirtërore.

I lutemi Allahut të Lartësuar t’ua lehtësojë rrugën hadxhilarëve, të pranojë ibadetin e tyre dhe t’u mundësojë kthimin në shtëpitë e tyre të shëndetshëm, të gjallë dhe me zemra të përmbushura.

foto nga: fb nagim Laposki