LABUNISHTA – Në ambientet e Xhamisë së Poshtme në Labunishta dje u mbajt një ngjarje fetare e rëndësishme dhe emocionuese e organizuar nga Mekteb Hidaje, e përkushtuar për t’i dhënë mirënjohje dhe lavdërim grave që me përkushtim dhe dashuri ndaj fesë përfunduan me sukses studimin e Teçvidit dhe leximin e Kur'anit të Ndershëm.

Mualimja Anisa Rochi (Juskoska) iu dorëzoi mirënjohje gjithsej 67 grave, prej të cilave:

51 gra përfunduan me sukses mësimin e Teçvidit (rregullat e leximit të Kur'anit),

15 gra përfunduan Xhetmën (leximin e plotë të Kur'anit),

dhe 1 grua mori mirënjohje për Hifzin (mësimin përmendsh të xhuzit Tebaraq).

Ngjarja u zhvillua në një atmosferë solemne dhe të ngrohtë, plot energji shpirtërore, inkurajim dhe mirënjohje. Një numër i madh grave morën pjesë në këtë aktivitet, duke vërtetuar edhe njëherë rëndësinë e arsimit fetar dhe rolin e gruas në ruajtjen dhe përcjelljen e vlerave shpirtërore në komunitet.

Ky sukses nuk është vetëm triumf personal i pjesëmarrëseve, por edhe një frymëzim për gjithë komunitetin, veçanërisht për brezat e rinj që shohin shembullin e përkushtimit, durimit dhe dashurisë ndaj dijes.

Mekteb Hidaje vazhdon misionin e tij për përhapjen e arsimit islam dhe ngritjen shpirtërore, duke vendosur standarde të reja përkushtimi dhe angazhimi.