Futbollisti i ri dhe premtues, Belul Elmazoski, është përforcimi më i ri i FK Shkupi në këtë afat kalimtar. Bëhet fjalë për një talent të lindur në vitin 2004 në Itali, i cili ka një përvojë të pasur në akademi të ndryshme futbolli atje, duke luajtur për ekipe italiane si Fiume Veneto Bannia, Aviano dhe Barbisano Eclisse.

Elmazoski, i cili vjen nga Boroveci, ka tërhequr vëmendjen e skautëve të FK Shkupi me aftësitë e tij teknike dhe potencialin në fushë. Ai luan në pozicionin sulmues krah. Drejtuesit e klubit janë të bindur për zhvillimin e mëtejshëm të tij si pjesë e projektit për fuqizimin e të rinjve dhe sjelljen e talenteve të reja në futbollin e vendit tonë.

"E zbuluam atë në Itali. Ka pasaportë italiane dhe maqedonase. Besojmë se ai do të zhvillohet në radhët tona, dhe emri i tij do të dëgjohet shumë në të ardhmen," deklaroi drejtor i përgjithshëm i klubit, Aykut Turan, pas nënshkrimit të kontratës.

Elmazoski, 20 vjeç, sot do të udhëtojë me ekipin për përgatitjet dimërore që do të mbahen në Antalia, Turqi.