Në orët e hershme të mëngjesit, banorët e Strugës dhe vendbanimeve përreth u zgjuan nga një tërmet me intensitet 3.6 shkallë sipas shkallës Rihter. Sipas informacioneve fillestare nga Observatori Sizmiologjik, epiqendra e lëkundjeve ishte afër fshatit Delogozhda, në një thellësi prej rreth 5 kilometrash.

Megjithëse tërmeti shkaktoi shqetësim te qytetarët, deri tani nuk ka raporte për persona të lënduar apo dëme materiale. Shërbimet përgjegjëse po ndjekin situatën në terren dhe janë në gatishmëri në rast nevoje për ndërhyrje.

Si pasojë e tërmetit, komuna e Strugës dhe vendbanimet përreth mbetën pa energji elektrike për rreth tre orë. Ekipet e EVN intervenuan në kohë dhe furnizimi me energji elektrike u normalizua përsëri.

Autoritetet bëjnë apel ndaj qytetarëve të qëndrojnë të qetë dhe të kujdesshëm, dhe nëse vërejnë ndonjë dëmtim apo dukuri që mund të përbëjë rrezik, të raportojnë tek autoritetet lokale.